വിരലടയാളമെന്ന അത്ഭുതം
വിരലടയാളമെന്ന അത്ഭുതം
ഒരുവനെ തിരിച്ചറിയുവാനായി പ്രകൃതി തന്നെ അവന്റെ വിരല്ത്തുമ്പുകളില് ഒരുക്കിവച്ച വിസ്മയമാണ് വിരലടയാളങ്ങള്. തൊടുന്നിടത്തെല്ലാം അവന് പോലും അറിയാതെ പതിഞ്ഞുവീഴുന്ന അത്ഭുത മുദ്ര. എത്രതന്നെ മാറ്റിമറികാന് ശ്രമിച്ചാലും മാറ്റമേതുമില്ലാതെ തുടരുന്ന ഒന്നുകൂടിയാണിത്. മറ്റൊരത്ഭുതം കൂടി. ഈ ഭൂമിയിലുള്ള സകലമനുഷ്യരുടേയും വിരലടയാളങ്ങള് അതിശയകരമാം വണ്ണം വ്യത്യസ്തങ്ങളുമാണ്. അതുകൊണ്ട് തന്നെ വിരലടയാളം വച്ച് മില്യണ്കണക്കിനു മനുഷ്യരുടെ ഇടയില് നിന്നും ഒരാളെ കണ്ടെത്തുക എന്നത് ആയാസകരമായ വസ്തുതയേ ആകുന്നില്ല. വിരലടയാലങ്ങള് ഇന്ന് സമസ്തമേഖലയിലും മനുഷ്യന്റെ ഏറ്റവും വലിയ ഐഡന്റിറ്റി കൂടിയാണ്.
പ്രാചീന കാലം മുതല് തനെ മനുഷ്യന് തങ്ങളുടെ കൈപ്പത്തിയും വിരലുകളുടെ അറ്റത്തുള്ള അടയാളങ്ങളും ശ്രദ്ധാപൂര്വ്വം വീക്ഷികുകയും അതിന്റെ പ്രാധാന്യം മനസ്സിലാക്കുകയും ചെയ്തിരുന്നു. ഹസ്തരേഖാ ശസ്ത്രവും വിരല്ത്തുമ്പിലെ അടയാളങ്ങള് നോക്കി ഭൂത ഭാവി പ്രവചനങ്ങളും മറ്റുമൊക്കെ നടത്തുന്നത് സാധാരണമായി. ആദിമമനുഷ്യര് തങ്ങളുടെ വാസസ്ഥാനങ്ങളായ ഗുഹകളുടെ ഭിത്തികളിലും കളിമണ് ഫലകങ്ങളിലുമൊക്കെ തങ്ങളുടെ കൈപ്പത്തി പതിപ്പിച്ചു അടയാളം സൂക്ഷിച്ചിരുന്നു. തങ്ങളുടെ അസ്തിത്വത്തിന്റെ അടയാളങ്ങളായി അവര് കൈപ്പത്തിയടയാളങ്ങളേയും വിരല്പ്പാടുകളേയും കരുതിയിരിക്കണം. കാലം കടന്നുപോകവേ ഉറപ്പിന്റേയും വിശ്വാസ്യതയുടേയും അടയാളങ്ങളായി വിരല്പ്പാടുകള് പ്രമാണങ്ങളിലും മുദ്രപത്രങ്ങളിലുമൊക്കെ ഉപയോഗിച്ചുതുടങ്ങി. ബാബിലോണ്യന് ജനതയാണ് ആദ്യമായി വിരലടയാളങ്ങള് പതിപ്പിച്ചുതുടങ്ങിയത്. കുറ്റപത്രങ്ങളില് കുറ്റവാളികളുടെ വിരല്പ്പാട് പതിക്കുക എന്നത് പുരാതന ഈജിപ്തിലെ കീഴ്വഴകമായിരുന്നു.ചൈനയില് ടാംഗ് വംശജരുടെ കാലത്തു വിരലടയാളങ്ങള് ശേഖരിച്ചിരുന്നതായി പറയപ്പെടുന്നു. ഒരുകാര്യമുറപ്പായിരുന്നു. ആദിമമനുഷ്യര് തൊട്ടേ തങ്ങളുടെ വിരല്ത്തുമ്പുകളിലുറങ്ങുന്ന അത്ഭുതത്തെ തിരിച്ചറിഞ്ഞിരുന്നു.
പതിനേഴാം നൂറ്റാണ്ടിന്റെ മധ്യമായപ്പോഴേക്കും വിരലടയാളങ്ങളെകുറിച്ച് ഗൌരവതരമായ പഠനങ്ങള് ആരംഭിച്ചിരുന്നു. മാര്ക് ട്വൈന് തന്റെ ഒരു നോവലില് കഥാനായകന് തന്റെ ഭാര്യയുടെ കൊലപാതകിയെ കണ്ടെത്തിയത് വിരലടയാളം നോക്കിയാണെന്ന് എഴുതിവച്ചു. മനുഷ്യരില് ഒരിക്കലും മാറ്റമില്ലാത്ത ഒന്നാണതെന്നും ഒരാളിന്റെതില് നിനും വ്യത്യസ്തമായിരിക്കും മറ്റൊരാളിന്റെ വിരല്പ്പാടും എന്നുമെഴുതി. അതുപോലെ തന്നെ ഷെര്ലക് ഹോംസ് കഥകളില് വിരലടയാളത്തിലൂടെ കുറ്റവാളിയെ തിരിച്ചറിയാമെന്ന് ഹോംസിനെ ക്കൊണ്ട് കോനന് ഡോയലും പ്രവചിച്ചു. എന്നിട്ടും ഒരുപാട് കാലം കഴിഞ്ഞാണ് മനുഷ്യന് മനുഷ്യനെ തിരിച്ചറിയുന്ന ആ മഹാത്ഭുതം പൂര്ണ്ണാര്ത്ഥതില് വികാസം പ്രാപിച്ചത്.
വിരലടയാളങ്ങളില് നിന്നും അതിന്റെ ഉടമയെ കണ്ടെത്താമെന്ന് ആദ്യം കണ്ടെത്തിയത് ബ്രിട്ടീഷ് ഇന്ത്യയിലെ ബംഗാള് പ്രവിശ്യയിലെ സബ് കളക്ടറായി ജോലി നോക്കിയ വില്യം ഹെര്ഷല് എന്ന യൂറോപ്യന് ആയിരുന്നു. ഗ്രാമീണരുടെ വിരല്പ്പാടുകള് മേശമേല് പതിഞ്ഞതു ശ്രദ്ധിച്ച് അതില് ഹരം കയറിയ ഹെര്ഷല് വിരല്പ്പാടുകളെകുറിച്ച് പഠനമാരംഭിച്ചു. ഗ്രാമീണരുടെ വിരലടയാളങ്ങള് പതിപ്പിച്ചെടുത്ത് അവയെ പഠിച്ചപ്പോള് ആ വിരലടയാളങ്ങള് എല്ലാം തികച്ചും വ്യത്യസ്തമാണെന്ന് കണ്ടെത്തി. അതോടെ കൂടുതല് ശ്രദ്ധ വിരലടയാളങ്ങളെക്കുറിച്ചുള്ള പഠനത്തിനായി നല്കി. വിരലടയാളങ്ങളില് നിന്നും കൃത്യമായി ആള്ക്കാരെ മനസ്സിലാക്കാമെന്നും അതുവഴി കുറ്റവാളികളെ കണ്ടെത്താമെന്നു മനസ്സിലായ ഹെര്ഷല് നാലഞ്ചുമാസം കഴിഞ്ഞ് അതിനെകുറിച്ച് ഒരു പ്രബന്ധം തയ്യാറാക്കി തന്റെ മേലധികാരിക്ക് സമര്പ്പിച്ചു. എന്നാല് ആ പ്രബന്ധം ചവറ്റുകുട്ടയിലെറിയപ്പെട്ടു. തന്റെ മഹത്തായ കണ്ടുപിടുത്തം ലോകമറിയാതെ പോയതോടെ നിരാശനായ ഹെര്ഷല് ജോലി രാജിവച്ച് ഇംഗ്ലണ്ടിലേക്ക് മടങ്ങി.
കുറച്ച് കാലങ്ങള്ക്ക് ശേഷം ഹെന്ട്രി ഫാള്ഡ് എന്ന ഡോക്ടര് വിരലടയാളങ്ങളെക്കുറിച്ച് ആകൃഷ്ടനായി അതിനെക്കുറിച്ച് പഠനമാരംഭിച്ചു. തന്റെ വീട്ടുജോലിക്കരുടേയും അയള്ക്കാരുടേയും സുഹൃത്തുക്കളുടേയും ആശുപത്രിയില് വരുന്ന രോഗികളുടേയും ഒക്കെ വിരല്പ്പാടുകള് ശേഖരിച്ച് അവ പഠനവിഷയമാക്കി. ആ വിരലടയാളങ്ങള് വച്ച് ഒരിക്കല് ഒരു മോഷ്ടാവിനെ ഫാള്ഡ് കുടുക്കുകയും ചെയ്തു. തുടര് പഠനങ്ങളില് നിന്നും അഴുക്കും മറ്റും പുരണ്ട വിരലുകളാല് മാത്രമല്ല കൈവിരല് തൊടുന്നിടത്തെല്ലാം വിരലടയാളം പതിയുമെന്ന് അയാള് കണ്ടെത്തി. തന്റെ കണ്ടെത്തലുകള് ഒരു ലേഖനമാക്കി ഫാള്ഡ് നേച്ചര് മാസികയ്ക് അയച്ചുകൊടുക്കുകയും അവര് അത് പ്രസിദ്ധീകരികുകയും ചെയ്തു. ഈ ലേഖനം കണ്ട ഹെര്ഷല് താന് ആദ്യം തന്നെ ഇത് കണ്ടെത്തിയതാണെന്നും അന്ന് എഴുതിവച്ചിരുന്ന വിവരങ്ങളുടെ ഡീറ്റലസും മറ്റും വച്ച് നേഛ്കര് മാസികയ്ക് കത്തെഴുതി. അങ്ങിനെ വിരലടയാളങ്ങളുടേ കണ്ടുപിടുത്തത്തിന്റെ പേരില് ഒരു വലിയ അവകാശത്തര്ക്കം തന്നെ ഉടലെടുത്തു.
അഭിപ്രായങ്ങള്
ഒരു അഭിപ്രായം പോസ്റ്റ് ചെയ്യൂ